చిత్రపటం

ఆ చిత్రకారుడు పొదుపరో లేక
రంగు అయిపోయినదో కాని

ఆకాశంలో సన్నటి గీత గీసాడు
అయినా నెలవంక కనపడుతోందిలే

చిన్నపిల్లాడు రంగంతా పారబోశాడేమో
ఆకాశం మరీ దట్టంగా నీలంగా ఉంది

ఆ తల్లి వడియాలు ఆరబెట్టిందో ఏమో
ఆకాశంలో నక్షత్రాలు మెరుస్తున్నాయి

ఏ తుంటరి వచ్చి ఒలకబోసాడో 
చిక్కటి పెరుగు – పేరుకుపోయింది మబ్బులా

ఎవరి దిష్టి తగిలిందో గాని
పగలంతా ఎర్రగానే ఉంది ఆకాశం

అమ్మకెంత ఓపికో
అంతసేపూ  తీసింది దిష్టి.